"በአሠሪዬ ከፍተኛ ጫና እየደረሰብኝ ነው" የኢትዮጵያ አየር መንገድ ሠራተኞች ማኅበር

(አዲስ ዘይቤ) የኢትዮጵያ አየር መንገድ ግሩፕ መሠረታዊ የሠራተኛ ማኅበር አሰሪው በሆነው በኢትዮጵያ አየር መንገድ በማኅበሩና በአባላቱ ላይ ከፍተኛ ጫና እያሳደረ አንደሚገኝ አመራሮቹ ለአዲስ ዘይቤ ተናገሩ፡፡

የማኀበሩ አመራሮች አየር መንገዱ የተለያዩ መሰናክሎችን ሲፈጥር መቆየቱን ጠቅሰው በኢትዮጵያ ሰራተኞች ማህበር ኮንፌዴሬሽን ጠሪነት (ኢሰማኮ) መስከረም 10፣ 2012 ማኀበሩ ሊመሰረት እንደበቃ ተናግረዋል፡፡

አየር መንገድ ግሩፕ በመሰረታዊ የሰራተኛ ማኀበር አመራሮች የተለያየ መልክ ያለው ጫና ያደረሰባቸው እንደሆነና የፖለቲካ አጀንዳ አላቸው በሚልም መሰረት የሌለው ውንጀላ እየቀረባበው መሆኑን ጠቅሰዋል፡፡ አንዳንዶቹን የማህበሩ አመራሮችን ከስራ የማገድ፣ ከስራ የማባረር፣ በግዳጅ የስራ ፍቃድ እንዲወስዱ ማድረግ፣ ስራ ያለመመደብ፣ ከስራ ውጪ የማድረግ እንዲሁም በግዳጅ ወደ ሌሎች ማዕከሎች (stations) እንዲመደቡ እና ሌሎች ተመሳሳይ በደሎች እየደረሰባቸው መሆኑን አብራርተዋል፡፡

እንዲሁም ተቋሙ ሠራተኞች እርስ በርስ የመገናኛ መድረክ (communication platform) ባለማመቻቸቱ ምክንያት ሠራተኛው በኢ-መደበኛ መልኩ በቴሌግራም ግሩፕ መልዕክቶችን ለመለዋወጥ እንደተገደደ ገልጸው ነገር ግን ድርጅቱ የተቋሙን ስም የሚያጠፋ መልዕክት ጽፋችኃል፤ ተጋርታችኋል በሚል ማሸማቀቅ እያደረሰባቸው እንደሆነ ቅሬታ አቅርበዋል፡፡

የኢትዮጵያ አየር መንገድ ግሩፕ መሰረታዊ የሰራተኛ ማኀበር የምስረታ ጉባዔን ካካሄደበት ከመስከረም 10፣ 2012 ጀምሮ እስከአሁን ድረስ ከ3 ሺህ 800 በላይ አዳዲስ አባላትን መመዝገቡን ገልጸዋል፡፡ ሆኖም ምዝገባ በሚያካሂዱበት ወቅት አንዳንድ ህገወጥ እንቅስቃሴዎችን ይመለከታል በሚል አየር መንገዱ በጥቅምት 17፣ 2010 ዓ.ም የማስጠንቀቂያ ደብደቤ ጽፏል፡፡ የደብዳቤው ጥቅል ይዘት ኢንዱስትሪውን በሚጎዳ መልኩ በደርጅቱ ግቢ እና በድርጅቱ የስራ ሰዓት አንዳንድ ሰራተኞች የአባላት ምዝገባ እያካሄዱ መሆኑን የሚጠቅስ ሲሆን ድርጅቱ ቅጥር ግቢ፣ በሠራተኞች መጓጓዣ ውስጥ፣ ውጪ ሀገር በሚገኙ ሆቴሎች፣ ምዝገባ ማድረግ እንደማይችሉና ይህንንም ሲያደርጉ ቢገኙ የስራ ውል እስከማቋረጥ እንደሚደርስ የሚገልጽ የኢሜይል መልዕክት መላኩን የማኀበሩ አመራሮቹ ይናገራሉ፡፡

በሌላ በኩል ደግሞ አዲስ ዘይቤ ከሌሎች ምንጮች ባገኘችው መረጃ መሰረት የአብራሪዎች የሙያ ማኅበር፣ በማኅበራችን የታቀፉ በኢትዮጵያ አየር መንገድ ግሩፕ ውስጥ የሚሰሩ አብራሪዎች የተጋረጠባቸው የበረራ ደኅንነት ስጋት በሚል ለኢትዮጵያ አመራር ግሩፕ ኮርፖሬት ሴፍቲ እና ለኢትዮጰያ አየር መንገድ ግሩፕ ስራ አመራር ስጋቱን የሚገልጽ ደብዳቤ እንደጻፈ ተረድተናል፡፡

ድርጅቱ በኢ-መደበኛ መልኩ ያቋቋመውን የቴሌግራም ግሩፕ ውስጥ ሰብሮ በመግባት በሕገ መንግስቱ የተጠቀሰውን የመናገር ነጻነት በሚገድብ መልኩ ሠራተኞች በዚሁ የመገናኛ ዘዴ ላይ ባሰፈሩት መልዕክት ምክንያት ከስራ የመታገድ፣ የማባረር፣ ቢሮ ጠርቶ የማስፈራራት እንዲሁም መሰል የመብት ጥሰቶች እየተፈጸመ መሆኑን ጠቅሶ አብራሪዎች ላይ የተለያዩ ጫናዎችን ማሳደር የበረራ ደኅንነቱን ጥያቄ ውስጥ እንደሚያስገባ የሙያ ማህበሩ ደብዳቤ ያትታል፡፡ እንዲሁም አብራሪዎች ዘንድ ከፍተኛ ያለመረጋጋት እየተከሰተ በመሆኑ በበረራው ደኅንነት ላይ እክል ከመፈጠሩ በፊት የችግሩን አንገብጋቢነት በመረዳት ከላይ የተጠቀሱት ሁለቱ አካላት ትኩረት ሰጥተው አስፈላጊውን እርምት እንዲወስዱ ይጠይቃል፡፡

• የኢትዮጵያ አየር መንገድ ግሩፕ መሰረታዊ የሰራተኛ ማኅበር

አዲሱ ማኅበር ሊመሰረት የቻለው የኢትዮጵያ አየር መንገድ ከሁለት ዓመታት በፊት የኢትዮጵያ ኤርፖርቶች ድርጅት መጠቅለሉን ተከትሎ በሁለቱ ተቋማት ይሰሩ የነበሩ ሠራተኞች ማኀበራት ወደ አንድ እንዲመጡ የትራንስፖርት መገናኛና ሰራተኛ ማኅበራት ፌዴሬሽን ሁለቱን ማኅበራት አደራድሮ አንድ ማኅበር እንዲመሰረቱ ለሁለት ዓመታት ጥረት ቢያድርግም ሊስማሙ ባለመቻላቸው ጉዳዩን ይዘው ወደ ኢሰማኮ መምራታቸው የኮንፌዴሬሽኑ ፕሬዝዳንት አቶ አባትሁን ታከለ ለአዲስ ዘይቤ ገልጸዋል፡፡

ከዚህ ቀደም ብሎ ኮንፌዴሬሽኑ ከሁለት ዓመታት ቆይታ በኃላ ግንቦት 2011 ዓ.ም ላይ የቀድሞ አመራሮች በጠሩት ስብሰባ መሰረት ከ800 በላይ የሚሆኑ ሰራተኞች ተገኝተው አዳዲስ አመራሮች እንዲመረጡ ጥረት አድርጓል፡፡

ሆኖም የአየር መንገዱ ኃላፊዎች ሦስት ምክንያቶችን ጠቅሰው ቅሬታ ለሠራተኛና ማኅበራዊ ጉዳይ ሚኒስቴር ማስገባታቸውን ተናግረዋል፤ የቀረቡት ቅሬታዎችም ዋና አብራሪዎች የስራ አመራር አካል ሆነው ሳለ የማኀበሩ አባል ሆነዋል፣ ምልዓተ ጉባዔ አልተሟላም እና በማኅበሩ ሁለት ዓመታት ያልቆዩ አመራሮች ተመርጠዋል የሚሉት ናቸው፡፡ ሆኖም የአዲሱ ማህበር አመራሮች ሦስቱም ቅሬታዎች ተገቢነት የሌላቸው መሆናቸውን ጠቅሰው፣ ዋና አብራሪዎች በአዋጁ መሰረት ሠራተኛን ስለማይቀጥሩ ስለማያባርሩ የስራ አመራር ያለመሆናቸውን፣ ምልዓተ ጉባዔ እና የሁለት ዓመት ቆይታ የተባለውም አዲስ በሚመሰረት ማኅበር ላይ የሚነሱ ጉዳዮች ያለመሆናቸውን በዝርዝር ይገልጻሉ፡፡

ግንቦት 2011 ዓ.ም በተመረጡት በማኀበሩ አመራሮች ላይ ማኔጅመንቱ ያለፍቃድ ማዛወር፣ ከስራ በጊዜያዊነት ማገድ እንዲሁም ማህበሩ በሁለት እግሩ እንዳይቆም ለማድረግ ተደጋጋሚ ሙከራ አድርገዋል፡፡

በመጨረሻም የአሰሪዎች ፌዴሬሽን፣ የኢትዮጵያ ሰራተኞች ማህበር ኮንፌዴሬሽን እና የሠራተኛና ማህበራዊ ጉዳይ ሚኒስትር ከተደረጉ ተደጋጋሚ ስብሰባዎች በኋላ ዋና አብራሪዎች በኢትዮጵያ ሰራተኛ አዋጅ መሰረት በሠራተኛው ማህበር ውስጥ እንዲሳተፉ መፈቀዱን ይናገራሉ፡፡ ሆኖም ኢ-መደበኛ በሆነ መልኩ አሰሪዎቻቸው ዋና አብራሪዎችን በመሰብሰብ ከማህበሩ ጋር የሚቀጥሉ ከሆነ ከጥቅማጥቅም ውጪ እንደሚያደርጓቸው በተደጋጋሚ ለድርድር እንደጠሯቸው ይናገራሉ፡፡

በመጨረሻም የኢትዮጵያ ሰራተኞች ማኅበር ኮንፌዴሬሽን (ኢሰማኮ) ሠራተኛውን ለማደራጀት ኃላፊነት ወስዶ ለአየር መንገዱ መሰብሰቢያ አዳራሽ እንዲፈቀድለትና ለሠራተኛው እንዲያሳውቅ ደብዳቤ መጻፉን ጠቅሰው መልስ እንዳልተሰጣቸው ይናገራሉ፡፡ በመጨረሻም ኢሰማኮ በሬዲዮ ማስታወቂያ አስነግሮ ሰራተኛውም በተለያዩ ኢ-መደበኛ የቴሌግራም ግሩፖች መልዕክቶችን በመለዋወጥ ለስብሰባው ዝግጁ መሆናቸውን ያነሳሉ፡፡ ሆኖም የአየር መንገዱ ኋላፊዎች ስብሰባው ህገወጥ መሆኑን የኢሚይል መልዕክት ለሠራተኛ መላካቸውን ያስታውሳሉ እንዲሁም የቆይታ ጊዜው ያለፈበት የቀድሞ ማህበርም ጉዳዩን አላውቀውም የሚል መልዕክት መላኩ ታውቋል፡፡

በመጨረሻም የአየር መንገዱ ኃላፊዎች ከኢሰማኮ ጋር ውይይት ካካሄዱ በኋላ በድጋሚ በኢሰማኮ ጠሪነት በአየር መንገዱ በጎ ፍቃድ ሰራተኛው በመስከረም 10፣ 2012 ዓ.ም የምስረታ ጉባዔውን በማካሄድ ካፒቴን የሺዋስን ፋንታሁንን ሊቀመንበር አቶ ማርቆስ የሱወርቅን ምክትል ሊቀመንበር፣ ጸሐፊዎችን እና ሌሎች የማኀበር አመራር አባላትን በመምረጥ ጉዳዩ ፍጻሜ አግኝቷል፡፡

የተለያዩ መጉላላቶች ውስጥ ያለፈው ማኀበር ጥቅምት 11፣ 2012 ዓ.ም የኢትዮጵያ አየር መንገድ ግሩፕ መሰረታዊ የሠራተኛ ማኀበር ከመስከረም 30፣ 2012 ዓ.ም ጀምሮ የፍቃድ እውቅና ማግኘቱን የሚያሳይ የምስክር ወረቀት ከሰራተኛ እና ማህበራዊ ጉዳይ ሚኒስቴር መቀበላቸውን አመራሮቹ ይናገራሉ፡፡

ሆኖም እነሱ ከተቀበሉ በኋላ የቀድሞ የአየር መንገድ ሰራተኞች ማኅበር ከሰራተኛና ማኅበራዊ ጉዳይ ሚኒስቴር ከሁለት ቀናት በኋላ የኢትዮጵያ አየር መንገድ ግሩፕ ቀዳማዊ መሰረታዊ የሠራተኛ ማኅበር በሚል የምስክር ወረቀት መቀበሉን ይገልጻሉ፡፡

ይህንንም ተከትሎ አየር መንገዱ ለሰራተኞች የእንኳን ደስ ያላችሁ እና ከአየር መንገድ ግሩፕ ቀዳማዊ መሰረታዊ የሠራተኛ ማኅበር ውጪ ሌላ የሚያውቀው ማህበር ያለመኖሩን የሚገልጽ የኢሜይል መልዕክት ለሰራተኛው መላኩን ይናገራሉ፡፡

የመጀመሪያው ኢትዮጵያ አየር መንገድ ግሩፕ መሰረታዊ የሰራተኛ ማኅበር እስከ ጥቅምት 30፣ 2012 ዓ.ም ድረስ የተለያዩ ጫናዎች መቀጠላቸውንና ቦቦሌ ወረዳ 13 በሚገኘው የአብራሪዎች የሙያ ማኅበር አዳራሽ ውስጥ የተደረገውን ህጋዊ ስብሰባ ህገወጥ ነው በማለት ስብሰባውን ለማደናቀፍ ከአየር ማረፊያው የጸጥታ አካላት እንደተላከባቸው ገልጸዋል፡፡

የአርታኢ ማስታወሻ፡- አየር መንገዱ ለተነሱት ጥያቄዎች ምላሽ ለመስጠት ጥያቄችንን ተቀብሎ መልስ እንዲሚሰጥ ቢገልጽም ይህ ጽሑፍ ይፋ እስከሆነበት ድረስ አላደረሰልንም፤ እንዲሁም የኢትዮጵያ አየር መንገድ ግሩፕ ቀዳማዊ መሰረታዊ የሰራተኛ ማህበር አመራር አቶ ተሊላ ደሬሳን በስልክ ለማግኘት ያደረግነው ሙከራ አልተሳካም፡፡ ምላሹ እንደደረሰን የምናቀርብ መሆኑን አዲስ ዘይቤ ትገልጻለች፡፡